LAOAG CITY – Ngimmina ti presyo dagiti lako a paputok ditoy ciudad ti Laoag ken bimmassit pay dagiti aggatang.
Daytoy ti inbatad ni Mrs. Angeline Aquino, maysa kadagiti aglaklako iti sirok ti Gilbert Bridge ditoy ciudad ti Laoag.
Segun ken ni Aquino, ngimmato ti 2 agingga ti 3 a pisos ti presyo dagiti lako da a paputok gapu ta nanginan ti presyo dagiti maaramid a paputok.
Innayon na a possible nga ad-adda pay a ngumina kabayatan nga umas asideg ti panangsarabo ti baro a tawen.
Inlawlawag na nga arigna awan pay ti naglakoan da ti paputok gapu ta manmano dagiti aggatang.
Inbatad na a basar iti maibagbaga kadakuada ket awan ti igatang dagiti aggatang nangnangruna dagiti mannalon gapu iti nababa a presyo ti irik.
Kabayatanna, inbatad ni Aquino a no addanto dagiti saan da a malako ita a tawen ket idulin da ken ilako danto manen iti umay a tawen.
Inpasingked na a saan a bumaba ti kalidad dagiti maipenpen a paputok no di ket ad-adda pay a pumigsa.
