LAOAG CITY – Inbilin dagiti soldado ti Israel kadagiti residente iti sumagmamano a lugar iti Gaza Strip nga agbakwit da paylaeng kabayatan ti panagsagsagana da iti panagibales da iti iraraot ti Hamas.
Daytoy ket kalpasan nga inkari ni Prime Minister Benjamin Netanyahu ti “nabileg a panagibales” ti Israel kadagiti militante a Palestinian para iti inawagan na a “black day”.
Immunan a nangipatungpal ti Palestinian militant group nga Hamas ti rocket attacks ken nangipatulod kadagiti tropa na iti Israel tapno mangisaknak ti maibilang a kagrabean a panagraot kalpasan ti sumagmamano a dekada.
Iti agdama, umaboten iti agarop 250 nga Israelis ti kumpirmado a natay idinto a ginasut a sabsabali dagiti mapapati nga hinostage ti Hamas.
Adda metten ti pakpakauna a panangipatungpal ti Israel ti air strikes idiay Gaza a nakatayan ti nasurok a 230 a tattao.
