LAOAG CITY – Inlawlawag ni Mrs. Dorothy Maribel Domingo, Principal I ti Caaoacan Elementary School nga awan ti kinapudnona ti reklamo a maipagarup nga agpamultada ti sangaribu a pisos kadagiti nagannak no saanda a mapan agatendar nga agdalus iti nasao a pagadalan.
Segun kenkuana, iti napalabas nga School Year 2023-2024 ket adda ti napagnunumoan dagiti nagannak a no asinoman ti saan nga umay agparang nga agdalus iti las-ud iti makatawen ket ditoy a mamulta gapu ta adda dagiti nagannak nga agat-atendar tapno agdalus.
Inbatadna a sakbay a naipatungpal daytoy a pagannurutan ket adda ti naiyuswat a taripnong dagiti nagannak ken dagiti mangisursuro iti nasao a pagadalan no sadino adda ti kasuratan a nagpinnirma dagitoy.
Inlawlawagna nga awan pay ti kinapudnona nga i-pending-da dagiti card dagiti estudiante gapu ta no adda ti mangala ti card ket dagusda met daytoy nga ited kadagiti maseknan nga agad-adal.
Innayonna a no adda man ti mabayadan dagiti ubbing ngem awan pay ti maitedda a pagbayad ket mabalin met dagitoy a makisarita no sadino adda ti mapirmaan a katulagan.
