LAOAG CITY – Napintas ti agbalbalin a resulta iti pannakaiyimplementar ti Project Aruga Program ditoy ciudad ti Laoag.
Segun kenni Mrs. Perlita Cabrello, ti mangidadaulo iti City Social Welfare and Development Office, dakkel a tulong ti nasao a programa para kadagiti ubbing nga addaan iti rangkap ti bagi wenno Persons with Disability.
Kunana a saan laeng a pinansyal a tulong ti maipapaay no di ket uray medical ken panangbagbaga kadagiti nagannak no ania dagiti rumbeng nga aramiden da tapno matulungan dagiti annak da iti nagduduma nga adal.
Inbatad na a babaen iti panagtitinnulong ti opisina da, kasta met ti Person’s with Disability Affairs Office ken dadduma pay a maseknan nga ahensia ti gobierno ket ad-adda a maiyimplementar a nasayaat ti nasao a programa.
Iti agdama, adda ti 100 nga ubbing a Persons With Disability (PWD) a dagitoy ket agtawen ti 0 agingga iti 17 ti benepisyaryo ngem manayunan pay ti 100 ita a tawen.
Babaen ti Aruga Project, maipaayan ti tulong pinansial ken pannarabay dagiti ubbing nga addaan ti rangkap ditoy ciudad ti Laoag a dakkel a pakalag-anan ti pamilia da.
