LAOAG CITY – Inbatad ni Engr. Randy Nicolas iti Provincial Disaster Risk Reduction and Management Council (RDMMMC) iti kapitolyo probinsyal a manarimaan paylaeng ti assessment da kalpasan ti idadayyeg ti magnitude 5.4 a gingined ditoy probinsya.
Segun ken ni Nicolas, kaadoan kadagiti Local Government Units ket awan ti pinasar da a perdisyon kalpasan ti insidente.
Inlawlawag na a dagiti laeng naireport kadakuada nga addaan ti perdisyon ket iti bell tower iti ili ti Bacarra no sadinno nga adda dagiti nakita a rikki isut gapuna a naiserra paylaeng daytoy manipod iti publiko.
Malaksid iti bell tower ket adda pay ti nairekord a perdisyon iti Multi Purpose Hall iti Barangay Duripes iti isu metlaeng nga ili ken iti dua a classroom iti Cadaratan High School iti ili ti Bacarra.
Inpakaammo pay ni Nicolas nga uray ti Sarrat church ket nagpasar ti sumagmamano a rikki idinto nga adda ti maysa a balay iti iti Barangay Lydia iti ili ti Marcos a partially damage.
Mainaig iti daytoy, saan pay a masinunuo ni Nicolas no mano amin ti balor dagiti nadadael gapu iti idadayyeg ti gingined gapu ta manarimaan paylaeng ti assessment da.
Innayon na a dagiti naireport nga adda ti perdisyon na ket agpapada a minor damages.
