LAOAG CITY – Inlawlawag ni Atty. Joel Gines, Provincial Election Supervisor a masapol a mangipila ti pormal a reklamo mainaig iti vote buying.
Segun kenkuana, saan nga umdas ti panangipatulod laeng ti text messages iti opisinada gapu ta kasapulan nga adda ti saksi a mangipaneknek nga adda ti napasamak a vote buying iti maysa a lugar.
Inbatadna a nasken pay nga adda ti ebidensia a mangipakita a pudno nga adda ti panaggatang wenno panaglako ti butos a napasamak.
Innayonna a makikoordinarda iti opisinada no adda ti maidatag dagitoy nga ebidensia tapno maipursige ti reklamo kontra kadagiti maseknan a kandidato para iti eleksion.
