LAOAG CITY – Kinondenar ni Senior Deputy Minority Leader at Mamamayang Liberal (ML) Party-List Rep. Leila de Lima nga offensive ken unfair ti inrakurak ni Batangas 1st District Rep. Leandro Leviste ti maipagarup nga adda pakainagan amin a kongresista iti vote buying.
Segun ken ni De Lima, saan nga umiso nga i-strike out manipud iti record ti alegasion. Inpettengna a kasapulan a personal nga ibabawi ni Leviste ti inrakurakna.
Nangrugi ti isiyu kalpasan ti alegasion ni Leviste mainaig ti maipagarup a vote buying dagiti sumagmamano a kongresista ket nakaala dagtoy ti sumagmamano a reaksion manipud kadagiti miembro ti Kamara de Representantes.
Mainaig iti daytoy, naikkan ni Leviste iti sabali a gundaway ket inlawlawagna a saan nga amin nga agpanpanday linteg ket adda pakainaiganna iti vote buying ket inbabawi na metlaeng ti sweeping claim-na.
Nupay kasta, kinuwestion met dagiti sumagmamano nga agpanpanday linteg nga awan ti pagbasaran dagiti alegasion ni Leviste kontra ken Executive Secretary Ralph Recto ken dadduma pay, karaman ditoyen ti sayangguseng a dakkel a campaign spending idiay Batangas.
Inpetteng ti kampo ni Recto nga awan ti pagibasaran dagiti pammabasol ken inawaganna a liar iti umuna a rakurak ni Leviste.
Iti agdama, naiyulin ti plenaro iti Committee on Rules mainaig kadagiti rakurak ni Leviste tapno mausig ken maikkan ti umno a tignay.
