LAOAG CITY – Pabor ni Atty. Alipio Castillo III, ti Provincial Supervisor iti Commission on Elections ditoy Ilocos Norte pakaseknan iti plano ni Presidente Ferdinand Bongbong Marcos Jr. nga aggiddan iti Charter Plebiscite ken Midterm Elections inton Mayo 2025.
Inbatadna a nasaysayaat no nasapsapa a maipakaammo kadakuada nga opisial ti Commission on Elections tapno masaganaanda a naimbag ti pannakaipatungpal ti baro a pagalagadan a masurot.
Kunana nga umdas ti maysa a tawen a panagsagana para iti daytoy laketdi maipaayan ti suporta para kadakuada manipod iti gobierno nasional kas ti naan-anay a pundo a mausar para iti ballaigi a pannakaipatungpal iti daytoy.
Inlawlawagna a napintas ti pannakaisayangkat daytoy gapu iti pannakausar dagiti tekhnolohia tapno ad-adda a mapaalisto ti pannakaiproseso ti eleksion.
Innayonna ti pananggutigot kadagiti umili a mapan agparehistro tapno maikkanda ti gundaway a makabutos iti mapaspasangasangan a panangpipili ditoy pagilian.
