LAOAG CITY – Nangisayangkat ti Provincial Veterinary Office ti panagsanay para kadagiti Out of School Youths wenno OSY ditoy probinsia.
Segun kenni Provincial Veterinarian Dr. Loida Valenzuela, napanunutanda a “cattle fattening” ti inyuswatda a panagsanay gapu ta ti naipatungpal a programa ket “cattle raising credit and financing.”
Inlawlawagna a dakkel ti pammatida a babaen iti idadalan dagiti maseknan iti nasao a panagsanay ket ad-adda pay a maipalawa ken makasusuro da ti umiso ken alisto a pinangpalukmeg ti baka.
Inbatadna a ti nasao a programa ket nagkammayyetan ti opisinada ken ti Provincial Social Welfare and Development Office.
Inbunannagna nga addan ti dua a bansada dagiti nabenipisiaran iti nasao a programa.
Kuna ni Valenzuela a kadagupan dagiti immuna a duapulo ket dua a benepisiario ket adda ti dua nga adda ti problemada.
Nupay kasta, impatalgedna a naiget a subsubaybayan ida dagiti pannakabagi ti opisinada. Imbalgakna a nalpas metten ti panagsanay a dimmalanan dagiti karaman iti maikadua a bansada.
Inpakaammona a ti in-charge iti special project iti opisinada ket kinuyogna dagiti pannakabagi dagiti OSY a napan nangpili kadagiti baka a maipaay ditoy Ilocos Norte para kadagiti dimmalan iti nasao a panagsanay.
Segun kenkuana, maipaay nga arigna loan ti maited a baka a taraknen dagiti maseknan. Innayonna a tumulong dagiti City/Municipal Agriculture Office nangnangruna kadagiti livestock coordinators a mangsubaybay kadagiti benepisiario.
Kabayatanna, kuna ni Valenzuela a kinaritna dagiti maseknan a no napintas ti pagbanagan dagiti maipataraken kadakuada ket maipaayanda ti gunguna manipud iti Provincial Veterinary Office.
