LAOAG CITY – Naminsan manen nga inawagan ni dati Presidente Rodrigo Duterte a drug addict ni Pres. Ferdinand “Bong-Bong” Marcos Jr., rason nga inawaganna ti militar ti Pilipinas a protektaran ti konstitusyon.
Inpetteng ni Duterte a napilayanen ti konstitusyon ti pagilyan, ken mamati daytoy nga awan sabalin a mangkorehir ken Pres. Marcos ken House Speaker Martin Romualdez no di ti militar.
Sinaludsod pay ni Duterte iti military no suportaran da kadi latta ni Marcos no maduktalan da a drug addict daytoy.
Mainaig iti daytoy, patien ti dati a presidente nga agkakunsabo ti Kongreso ken ni Marcos para iti panggep da a mangbalbaliw iti konstitusyon.
Kunana a posible nga maaddaan ti transition iti posisyon da inton agngudo ti termino ni Marcos, agbalin a parliamentary prime minister ni Romualdez, idinto a ceremonial president ni Marcos.
Kagiddan iti daytoy, inpetteng ni Duterte a naruay dagiti rumbeng a tutokan nga isyu, maysa ditoy ti pannakaiyakar ti sobra a P89.9 billion a pondo ti PhilHealth iti National Treasury, saan ket di a ti nagbalin a pangta ti anakna a ni Vice President Sara Duterte nga adda binilin na a mangpapatay ken ni Marcos, iti First Lady ken ni Romualdez.
Malaksid iti daytoy, inawagan pay ni Duterte ti napasamak ken ni bise presidente Sara ken ti chief of staff na a ni Atty Zulieka Lopez nga insignificant.
