LAOAG CITY – Inpakaammo ni Engr. Neil Jose, ti mangidadaulo ti Pugad Lawin nga adda ti isayangkat da nga operation kugit iti Paoay Central Elementary School intono Mayo 17, mangrugi iti oras ti alas-otso ti bigat.
Kunana a kabinnulig ti grupo da ti Mariano Marcos State University – High School Paoay Campus- Batch 94
Inbatad na a target da ti mangokomodar ti sumurok-kumurang a 100 nga indibidwal para iti libre a kugit.
Inlawlawag na a saan laeng a dagiti taga Paoay ti mabalin a manggundaway iti daytoy no di ket uray kadagiti dadduma nga ili ditoy probinsya.
Segun kenni Jose, dagiti kayatna a gundawayan ti libre nga operation kugit ket agturong leng iti nasao a pagadalan ken awan ti kasapulan nga itugot da, ngem kasapulan nga agpakadwa kadagiti nagannak no dagitoy ket ubbing.
