LAOAG CITY – Napatawan ti ‘perpetual disqualification from public service’ ni Patrolman Francis Steve Fontillas, ti pulis a nangbabalaw iti nagbalin a panangarestar ken ni dati a Presidente Rodrigo Duterte.
Nangiruar ti desision ti National Police Commission kalpasan ti naiwayat nga imbestigasion ken deliberasion ken naan-anay a dinismis ti baro a pulis gapu kadagiti nagduduma a rason pakairamanan ti grave misconduct, conduct unbecoming of a police officer ken disloyalty to the government.
Iti naiwayat nga En Banc Deliberations, nagbalin nga unanimous ti butos dagiti National Police Commission officials kontra ken ni Fotillas.
Inpetteng ni National Police Commission Vice Chairperson ken Executive Officer Rafael Vicente Calinisan, ti immuna a panag-resign ni Fotillas ket saan a makatulong kenkuana iti administrative ken criminal cases a sangsangoenna kabayatan a miembro pay isuna ti Philippine National Police.
Maipalagip a nag-resign ti kontrobersial a pulis, sumagmamano a lawas kalpasan a binabalawna da Presidente Ferdinand ‘Bongbong’ Marcos Jr. ken ti nailian a pulisia a pagpapaayanna gapu iti pannakaarestar ti dati a Presidente.
Mainaig iti daytoy, binabalawna pay da Philippine National Police Chief, Gen. Rommel Francisco Marbil, CIDG director, Maj. Gen. Nicolas Torre III ken PNP spokesperson, Brig. Gen. Jean Fajardo.
Mangnamnama ni Calinisan nga agbalin a warning daytoy kadagiti pulis.
Inpaganetget ti National Police Commission Chief, naiget a maipatungpal ti ‘no politics’ policy kadagiti unipormado a grupo.
