LAOAG CITY – Saan a maiyakar iti sabali a probinsya dagiti kameng ti Philippine National Police (PNP) nga adda ti kabagyan na nga agkandidato para iti 2022 elections.
Daytoy ti inbatad ni Police Major Lauro Milan, ti mangidadaulo iti Provincial Administrative Resource and Management Unit ti Ilocos Norte Police Provincial Office (INPPO).
Segun ken ni Milan, umabot iti nasurok a 10 dagiti kameng ti pulisya a naestablisar da nga adda ti kabagyan na iti nakaidestinoan da nga ili ditoy probinsya iti agdama.
Nupay kasta, basar iti mandar ti PNP higher office ket saanen a kasapulan a maiyakar da iti sabali a probinsya no di ket maiyakar da laeng iti sabali nga ili ditoy met laeng Ilocos Norte.
Maipalagip a kadagiti naglabas nga eleksyon ket naimandar ti pannakaiyakar iti sabali a probinsya dagiti kameng ti pulisya nga addaan ti kabagyan nga agkandidato iti eleksyon.
