LAOAG CITY – Emosyunal ni Mr. Rodel Bartolome, maysa a PWD ken agmaymaysa nga agnanaed iti balay na iti Sitio Nasdek, Barangay Balatong ditoy ciudad ti Laoag gapo ta saan a nairaman kadagiti benipisyaryo ti Social Amelioration Program (SAP).
Segun kenni Bartolome, ammo dagiti opisyal ti barangay a maysa isuna a PWD ngem maipagarop nga awan ti napan wenno nangkita kenkuana kabayatan ti panagilista da kadagiti benipisyaryo.
Naamoan a ni Bartolome ket walo a tawenen a PWD ken agur-urnos ti sabong para iti flower shop ngem gapo iti covid-19 pandemic ket naisardeng met ti pagsapulan na.
Inlawlawag na a ni laeng maaw-awat na ket dagiti relief goods nga ited ti barangay ken ciudad, ken naipaayan pay isuna ti sangaribo a pisos nga inted ti lokal a gobyerno ditoy ciudad ti Laoag.
Inbatad ni Bartolome a napan ti kabsat na iti barangay seknan iti daytoy a banag ngem maipagarop a ti sungbat ti barangay ket saan a kwalipikado gapo ta agmaymaysa nga agbibiag.
Kabayatanna, inlawlawag ni Barangay Chairman Joseph Bitagon iti Barangay Balatong ditoy ciudad ti Laoag no apay a saan a nairaman ti nagan ni Rodel Bartolome a makaawat iti Social Amelioration Program (SAP).
Kunana nga iti payroll ti SAP ket ni Bartolome ti nakainagan ngem naamoan da a saan a mabalin a makaawat gapo ta agmaymaysa iti baig.
Nupay kasta, kuna ni Bitagon nga adda ti internal arragement da iti pamilya ni Bartolome a ti kayong na a ni Michael Yapit ket isu ti mainagan kas family head ken isu ti mangawat ti kwarta ngem maiyawat met laeng daytoy kenni Bartolome.
Segun kenni Bitagon, sinigurado met ni Barangay Kagawad Zaldy dela Cruz nga inyawat na a mismo ti kwarta kenni Bartolome.
Naamoan a ni Yapit a maysa a construction worker ket saan a karaman kadagiti benipisyaryo gapo ta uray naisardeng ti trabaho na ket adda dagiti nagtrabahoan na iti baet ti lockdown.
Kunana a ti naibaga kadakuada ket saan a kwalipikado ti maysa a tao no agtultuloy latta nga agtrabtrabaho.
Kabayatanna, kuna ni Bartolome a ti 5,500 a pisos ket naggudwa da kenni Yapit gapo ta inbatad met ti barangay a saan a kwalipikado iti SAP.
