LAOAG CITY – Pormalen a naglippas ti Region 1 Athletic Association (R1AA) Meet a naiyuswat ditoy Ilocos Norte a nagpaot ti innem nga aldaw.
Iti naiyuswat a culminating program ket napadayawan dagiti delegasyon iti nagduduma nga awards a pakairamanan dagiti Special Awards.
Nabigbig kas Best Performing Schools Division iti biang ti tennis ti Alaminos City, idinto a ti Laoag City ket iti Chess, ken ti Ilocos Sur ket iti football ken pencak silat, ken ti Urdaneta City ket iti Sepak Takraw ken Wrestling.
Nagun-od met ti Dagupan City ti Arnis, boxing, swimming, ken aerogymnastics idinto a ti Pangasinan 1 ket iti basketball, billiards, taekwondo ken dancesports, ken ti San Carlos City ket iti biang ti Special Games kas iti Athlectis ken swimming.
Malaksid kadagitoy, naiyalat met ti Pangasinan 2 ti archery, badminton, table tennis, volleyball ken wushu idinto a ti Ilocos Norte ket baseball, athletics, gymnastics ken softball.
Kabayatanna, it biang ti Special Awards, napadayawan kas Most Organize Delegation ken Most Discipline Delegation ti San Carlos City; Eco-Friendly and Greenest Delegation ti Ilocos Sur; ken ti Best Billeting Center ket ti Shamrock Elementary School a ti nagtalinaed ket ti delegasyon manipud San Carlos City.
