LAOAG CITY – Dakkel ti nagbabaan ti trust ken approval rating ni Vice President Sara Duterte iti kaudian a survey ti Pulse Asia ken Social Weather Station (SWS) idi Setiembre.
Nupay dagiti nangangato nga opisial manipud ken ni Pres. Ferdinand Marcos Jr. agingga ken ni House Speaker Martin Romualdez ket bimmaba ti rating dagitoy idi Setiembre, maripar a ti laeng rating ni Bise Presidente Sara ti dakkel ti nagbabaanna.
Basar iti Pulse Asia Survey, bimmaba ti 10 a puntos ti trust rating ti Bise Presidente manipud iti 71% idi Hunio ket itan adda laengen a 61%.
Sangapulo a puntos ti nagbabaan ti trust rating ni Vice Pres. Sara idi Setiembre, manipud iti 65% idi Hulio 2024 ken itan ket nagbalin laengen a 55%.
Bimmaba met ti siam a puntos ti approval rating ni Vice Pres. Duterte manipud iti 69% idi Hunio ken itan ket 60% laengen.
Iti National Capital Region (NCR), 28 puntos ti nagbabaan ti approval rating ni Vice Pres. Sara, manipud iti 64% idi Hunio, itan ket 36% laengen.
Naammoan a ti imbestigasion ti Kongreso maipanggep iti intelligence ken confidential fund ni Vice Pres. Sara ti posible a rason ti panagbaba ti rating daytoy.
Kabayatanna, bimmaba met ti rating da Pres. Marcos, Senate Pres. Francis ‘Chiz’ Escudero ken Speaker Romualdez ngem apagapaman laeng maidasig iti panagbaba ti rating ti Bise Presidente.
