LAOAG CITY – Inpannakkel ni Liliana Villarreal, Artemis II Landing and Recovery Director ti natalged ken sistematiko a pannakarekobreda iti uppat a crew ti Artemis II kalpasan ti naimballigian nga splashdown iti kabaybayan a paset ti San Diego, California.
Segun kenkuana, ti naannad a panagsagsagana, paulit‑ulit a rehearsals ken contingency plans ti nagbalin a tulbek tapno masigurado ti naurnos nga operasion.
Kalpasan ti siam nga aldaw a misyon iti lawlaw ti bulan, natalged a nakasubli da Reid Wiseman, Victor Glover, Christina Koch ken Jeremy Hansen nga insigida a dimmalan iti medical check ken nakumpirmaran nga adda iti nasayaat a kasasaad dagitoy.
Kuna ni Villarreal, gagem ti operasionda a saan laeng a ti natalged a panangala ti crew no diket pakairamanan ti napaspas a panag‑secure ti Orion spacecraft para iti panangtingiting ken data collection.
Ti Artemis II ket nakaaramid ti baro a rekord kas kaadayoan a distansia a nadanon ti tao manipud iti lubong nga umabot iti sumurok 400,000 a kilometro ken nangipaay kadagiti ladawan a naala manipud iti lunar orbit pakairaman ti langa ti “Earthset.”
Ti naimballigian a recovery ket makitkita a napateg nga addang nga agturong iti Artemis III a manamnama a mangikabil kadagiti astronaut iti rabaw ti bulan iti umuna a gundaway sipud pay idi 1972.
