LAOAG CITY – Kalikagum ni konsehal Handy Lao nga agbalin a regular ti panagpwesto dagiti Micro Small and Medium Enterprise iti Aurora Park ditoy siudad ti Laoag.
Kuna na a kayat na nga agtalinaed dagiti aglaklak ken agbayad dagitoy ti renta iti lokal a gobierno.
Inbatad na a dakkel a makaawis daytoy kadagiti turista ken basar iti obserbasyon na ket positibo ti resulta ti panagpwesto dagiti aglaklako.
Kabayatanna, kuna ni konsehal Bryan Alcid a masapol a maadal ti lungalong ni Lao gapu ta posible nga agriri dagiti business owners nga agbaybayad ti fix rentals.
Innayun met ni konsehal Jason Perera a saan a rumbeng a marentaan ti public plaza basar iti maysa a desisyon ti korte suprema idinto a a dinakamat ni Konsehal Juan Konrado Respicio a nakaiyataday iti revised revenue code ditoy siudad a dagiti seasonal ken mobile merchants ket saan a mabalin a masingir iti renta.
