LAOAG CITY – Nakared-alert iti intero a rehiyon uno gapu ti iduduprak ti bagyo Ompong.
Daytoy ti inbatad ni Mr. Melchito Castro, ti mangidadaulo iti Office of the Civil Defense (OCD) iti region I iti eksklusibo nga interview iti Bombo Radyo Laoag.
Inbatad na a sipud pay idi rabii ket nakafull-alert amin a maseknan nga ahensya iti gobierno.
Segun ken ni Castro, no saan nga agbaliw ti direksyon ti bagyo ket dakkel iti epekto na ditoy probinsya.
Kuna na pay nga idi pay laeng lunes da a nagtataripnong kadagiti maseknan nga ahensya iti gobierno seknan iti bagyo Ompong.
Innayon na nga addan dagiti inbaon da a kameng iti Armed Forces of the Philippines (AFP) ditoy Ilocos Norte tapno agbantay ken tumulong iti panawen ti kalamidad.
Mainaig ti daytoy, inbalakad ni Castro iti publiko kangrunaan na dagiti mangngalap a saan da paylaeng a tumaptappog iti baybay.
