LAOAG CITY – Inpetteng ni Davao City 1st District Rep. Paolo Duterte a saan a kriminal ti amana a ni dati a Presidente Rodrigo Duterte nga iligal nga inarestar ken inbalud.
Mensahe daytoy ni Rep. Duterte, kagiddan iti maika-100 nga aldaw a nakabalud ti amana iti detention facility ti International Criminal Court idiay The Hague.
Nasakit para ken ni Congressman Pulong ti napasaran ti amana nga inpaayna ti biagna tapno agserbi ditoy pagilian ken tapno agbiag dagiti umili ti nakappia, awan ti buteng ken addaan ti dignidad.
Gapu iti daytoy, nagpanawagan ni Rep. Duterte iti tunggal maysa nga agsindi ti kandela ken mangisagut ti panagkararag para iti kinatibker, salun-at ken pannakawaya-waya ni dati a Presidente Duterte.
Mamati ni Congressman Pulong a maipatungpal ti hustisia, kinapudno ken mangnamnamada a saan a baybay-an dagiti Pilipino ti dati a Presidente a limmaban para kadakuada.
