LAOAG CITY – Kiniddaw ni Davao City Rep. Paolo Duterte iti National Bureau of Investigation (NBI) nga iraman iti imbestigasyon dagiti flood control projects a maikonkonektar iti distrito ni Laguna Rep. Ann Matibag, ti asawa ni NBI Director Melvin Matibag.
Daytoy ket kalpasan ti rakurak ti National Bureau of Investigatio a paawagan na dagiti contractor a konektado kadagiti red-flagged flood control projects iti umuna a distrito ti Davao City.
Inbatad ni Duterte a kayatna a makita dagiti dokumento, video ken mismo a proyekto a maibagbaga a substandard wenno ghost projects.
Inpetteng ni Duterte a masapol nga agpapada ti pagannurutan ti imbestigasyon iti amin a lugar ken saan a rumbeng a pilyen laeng ti im-imbestigaren.
Sinaludsud pay ti agpanpanday linteg no paawagan ti NBI dagiti contractor a Discaya a maipagarop a karaman iti dua a proyekto iti distrito ni Rep. Matibag.
Segun ken ni Duterte, adda dagiti video ken dokumento da a maikonkonektar kadagiti nasao a proyekto.
Nagpanawagan ni Duterte nga ipublikar ti NBI ti imbestigasyon da, karaman dagiti ebidensya ken resulta ti panagdengngeg, tapno makita ti publiko ti aktuwal nga ar-aramiden dagiti otoridad.
