LAOAG CITY – Inawagan ni House impeachment trial spokesperson ken Kabataan Party-list Rep. Renee Co a “tunog lata” ti pre-trial brief ni Vice President Sara Duterte iti sangsangwen na nga impeachment case, gapu ta maipagarop a nakurang ti substansya na ken saanna a direkta a sinungbatan dagiti kangrunaan nga alegasyon kontra kenkuana.
Segun ken ni Co, napaay ti depensa a mangipaay ti nalawag a palawag mainaig iti maipagarop a saan nga umiso a pannakausar ti confidential funds, saan a mailawlawag a kinabaknang ken dagiti pangta kontra kadagiti nangangato nga opisyal ti gobierno.
Inpetteng ni Co a nailanad iti pre-trial brief nga agpila ti depensa kadagiti testigo ken dokumento tapno paglikudan dagiti alegasyon, ngem awan ti nailawlawag a detalye no kasanu nga aramiden daytoy.
Dinakamat pay ni Co ti isyu dagiti acknowledgment receipt a nakainaigan ti “Mary Grace Piattos,” a basar iti sertipikasyon ti Philippine Statistics Authority (PSA) ket awan ti rekord na iti database da.
Naikeddeng a rugyan ti Senate impeachment court ti trial intono Hulyo 6 kalpasan a makumpleto ti pre-trial process.
Inpaganetget pay ni Co a saan a seryoso ti depensa iti proseso.
