LAOAG CITY – Inlawlawag ni Ilocos Norte 1st District Representative ken Presidential Son Sandro Marcos no apay nga isuna ti immuna a nagpirma iti pannaka-impeach ni Vice President Sara Duterte.
Segun kenkuana, ti kangrunaan a rason no apay nga indauloanna ti panagpirma kadagupan kadagiti 215 a kongresista a nagbutos iti impeachment ket gapu iti nagbalin a rakurak idi ti Bise Presidente a kalienna ti bangkay ti lolona a ni dati a Presidente Ferdinand Marcos Sr. nga adda iti Libingan ng mga Bayani ken ibellengna daytoy iti West Philippine Sea.
Malaksid iti daytoy, inbatadna a maysa pay kadagiti rason a nangiduron kenkuana nga agpirma para iti impeachment ket ti panangipangta ni Vice President Sara a papatayenna dagiti nagannakna nga isuda Presidente Ferdinand Bongbong Marcos Jr., First Lady Liza Araneta Marcos pakairamanan ni House Speaker Martin Romualdez.
Kunana a saanna nga inallukoy dagiti padana nga agpanpanday linteg nga agpirma tapno ma-impeach ti Bise Presidente.
Innayonna nga awan ti kinapudnona nga adda ti maipaay a kuarta kadagiti kongresista a nagpirma para iti impeachment kontra iti maikadua a kangatoan nga opisial ti pagilian.
