LAOAG CITY – Saan a pabor ni Presidential Son ken House Majority Leader Sandro Marcos ti Ilocos Norte nga insigida a mangiwayat ti Kamara ti imbestigasion mainaig iti pannakairaman dagiti sumagmamano nga agpanpanday linteg iti flood control projects.
Inbatad ni Rep. Marcos a nasaysayaat no iyuray pay laeng no ania ti agbalin a direktiba ti Malakanyang.
Inlawlawagna nga addan ti inruar a listaan ni Presidente Ferdinand Marcos Jr. a maipagarup a nakaala ti binilyon a pisos a balor ti flood control projects.
Para ken ni Congressman Marcos, napinpintas no maikkan ti gundaway ti Presidente a mapatgan dagiti impormasion a nakadanon kenkuana ken saan daytoy a ganaten gapu ta kasapulan ti naun-uneg nga imbestigasion.
Dinakamat ni Marcos a mabalin met a tumulong ti Kamara iti babaen ti panagkalap kadagiti nayon nga impormasion ken panangduktal kadagiti napasamak nga anomalya.
