LAOAG CITY – Kinumpirmaran ni Mrs. Vilma Eda, ti schools division superintendent iti Department of Education ditoy siudad ti Laoag nga addan ti masurot a reshuffling.
Kuna na a daytoy ket basar iti pammilin ti DepEd Central Office nu sadino nga adda ti pannakaiyakar dagiti schools division superintendents.
Segun ken ni Eda, maiyakar daytoy iti Vigan City Division ken ni Schools Division of Ilocos Norte Dr. Joan Corpuz ti sumukat ditoy siudad ti Laoag.
Mainaig iti daytoy, inpakaammo na a ti sumukat iti Schools division of Ilocos Norte ket manipod iti probinsya ti La Union idinto a ni Schools Division Superintendent Joel Lopez iti DepEd Batac City ket mapan iti Ilocos Sur.
Kabayatanna, ti met sumukat ken ni Lopez iti Batac City ket ti Schools Superintendent a sublaten ni Eda iti Vigan City, Ilocos Sur.
Kuna ni Eda a ti reshuffling dagiti schools division superintendent ket mapasamak manen kalpasan ti tallo a tawen.
Maipalagip nga addan ti pannakadakamat ni Eda a mapasamak ti re-shuffling kadakuada nga schools division superintendent itay napan a tawen ngem naitantantan gapu iti naiyuswat nga eleksyon.
Kabayatanna, manamnama a mangrugi ti panagsukat dagiti mangidaulo kadagii schools division intuno Abril 3 ita a tawen.
