LAOAG CITY – Naipasa ti Draft Provincial Resolution No. 2024-01-241 iti maikadua ken maudi a pannakaibasana kabayatan iti naisayangkat a regular session iti Sangguniang Panlalawigan.
Gagem ti nasao a resolution nga agkiddaw ken ni Presidente Ferdinand Bongbong Marcos Jr. a maideklara kas special non-working holiday ditoy Ilocos Norte inton Pebrero 2 iti agdama a tawen ken iti sumarsaruno pay a tawen.
Segun ken ni Sangguniang Panlalawigan Member Atty. Franklin Respicio, Chairman ti Committee on Laws, Rules, Ethics and Privileges, ti Pebrero 2 iti kada tawen ket isu ti pannakaselebrar iti Founding Anniversary ditoy Ilocos Norte.
Inbatadna a daytoy ket paset iti pananglagip iti panagbalin kas probinsia ti Ilocos Norte idi Pebrero 2, 1818.
Kunana a daytoy a selebrasion ket saan laeng a mangipakita iti kinaammo iti publiko no di ket pakairamanan pay ti panangbigbig iti kinabaknang ti kultura ken panagkaykaysa dagiti Ilokano.
