LAOAG CITY – Kinumpirmaran ni Police Captain Johnveil Maramag, chief of police ti PNP-Marcos ti panagpappaputok ti paltog ti retirado a kameng ti BFP iti Barangay Fortuna iti nasao nga ili.
Nabigbig daytoy a ni Emerito Albano, dati a kameng ti BFP ken agnanaed iti nasao a barangay.
Segun kenni Maramag, idi rabii ket napan da nagresponde iti nasao a barangay kalpasan a nakaawat da ti tawag seknan iti daytoy ken inadmitir met ni Albano a nagpaputok ti paltog iti namindua a daras ken insuko na ti kalibre 45.
Kunana nga iti papan da iti parte ti balay ni Albano no sadinno a nagpaputok ti paltog ket nakarekobre da ti dua a basyo ti bala.
Inlawlawag na a basar iti palawag ni Albano ket nakapungtot kadagiti aso ti karruba na gapo ta maipagarop a kinagat da dagiti taraken na a manok rason metten a saan nan a nakontrol ti bagbagi na.
Naamoan nga awan met ti nairaman a tao kabayatan ti panagpaputok ti paltog ni Albano ken kumpleto ti dokumentos ti nasao a paltog kas iti Permit to carry firearms outside residence, LTOP ken dadduma pay.
Nupay kasta, kuna ni Maramag a naipila latta ti kaso nga Alarm and Scandal kontra kenni Albano.
