LAOAG CITY – Inbatad ni Barangay Chairman Gil Ramos iti Barangay 35, Gabu Sur ditoy ciudad ti Laoag nga awan pulos dagiti kabarangayan na a makapan agkalap gapu ti kapigsa ti angin ti agdama.
Inlawlawag na a malaksid a napigsa ti angin ket nadawel pay ti dalluyon.
Mainaig ti daytoy, kinumpirmaran ni Kapitan Ramos nga arig na pimmusay aminen dagiti tilapia nga adda kadagiti fish cages ti barangay da.
Inbatad na a dagiti sumagmamano a nabati ken nagbiag ket inkabil dan ti fish pond.
Segun ken ni Ramos, natay dagiti taraken a tilapia gapu ti napigsa nga angin ken nakaro nga apgad ti danom.
Innayon ni Ramos a gapu ti napasamak ket pinilit lattan dagiti sumagmamano a kabarangayan na nga innala ken inlako dagiti taraken da a tilapia tapno saan da unay a malugi.
Kinumpirmaran ni Barangay Chairman Gil Ramos iti Barangay 35, Gabu Sur ditoy ciudad ti Laoag a nangrugi a nagpeste dagiti taraken a tilapiya nga adda kadagiti fish cages ti Barangay da idi Enero 31 ita a tawen.
Inbatad na a saanna a maibaga no manu amin ti pakabuklan dagiti natay a tilapiya ti barangay da.
Nupay kasta, inlawlawag na a ti kada fish cage ket nasurok a sangaribo ti karga na a tilapiya a natay.
Innayon na nga uray dagiti tilapiya nga adda kadagiti fish cages ti Metro Gabu ket karaman da a natay.
