LAOAG CITY – Rinibu a tattao ti nagprotesta iti sango ti National Assembly idiay Seoul idi Disiembre 6, 2024, tapno awaganda ti panagikkat ni Presidente Yoon Suk Yeol.
Iti paki-uyuman ti Bombo Radyo Laoag Ms. Zenaida Closa, Bombo International News Correspondent idiay South Korea a rinibu a tattao ti naguummong iti sango ti National Assembly idiay Seoul tapno umawag iti pannakaikkat ti presidente iti puestona.
Nupay kasta, nagpadispensar ni Yoon gapu iti panangideklarana iti martial law idi December 3 ket inpasigurado na a saanan nga uliten daytoy.
Iti laksid a nagkiddaw ni President Yoon Suk-Yeol, nagtalinaed ti pungtot dagiti umili rason nga agtultuloy a nagprotesta dagitoy iti nasao a lugar.
Kinunana a ado dagiti nasdaaw iti nagbalin a desision ti presidente, a nakaigapuan ti panagbuteng dagiti dadduma.
Basar iti impormsaion, inlawlawag ti administrasion ni Yoon a naideklarada ti martial law tapno masalakniban ti pagilian manipud iti pangta ti puersa ti North Korea.
Kabayatanna, kuna ni Closa nga ipaima ni Presidente Yoon ti agbalin a decision ti gobierno iti impeachment na.
