LAOAG CITY – Nailako iti balor a $44.6 million ti nabirukan a kadakkelan nga stegosaurus skeleton idiay New York.
Idi Mayo 2022, nakali ti rurug ti stegosaurus iti maysa a private land idiay Colorado, U.S.A.
Ti nasao a rurug ti stegosaurus a napanaganan ti “Apex” ti nabirngasan a maysa kadagiti kumpleto pay laeng dagiti kalansayna a dinosaur a naduktalan iti tay-ak ti paleontology.
Adda ti kadakkelna daytoy nga 11 feet tall ken 27 feet long ken addaan daytoy ti 254 fossil bone elements no sadinno mapattapatta nga agtawen daytoy ti 161 million.
Sakbay a narugian ti pannakailakona, mangnamnama ti Sotheby’s auction house a mangilaklako daytoy a dumanon iti $6 million ti kadakkelan a bid daytoy.
Nupay kasta, idi mangrugin ti panangilako iti daytoy ket nakigtot isuda iti nagsasaruno a tawag manipud kadagiti telephone bidders ken dimmanon iti 44.6 million ti bid daytoy.
Gapu iti daytoy, nakairekord ni Apex a kadakkelan a gatad kadagiti rurug ti dinosaur. Ti previous record ket $31.8 million para iti rurug ni T-Rex idi 2020.
Nagkedked met ti Sotheby’s no asino ken ayanno a pagilian ti naggapoan ti winning bidder.
