LAOAG CITY – Naminsan manen a nangiwayat ti missiles ken drones ti Russia kontra iti Ukraine.
Inbatad ni Ukrainian President Volodymyr Zelensky a mangipakpakita laeng a ti ar-aramiden ti Russia ket saanda nga interesado a maaddaan ti nakappia a panagsinnarita.
Inkeddeng inton sumaruno a lawas ti Estados Unidos ti sabali manen a panagsinnarita iti nagbaetan ti Russia ken Ukraine.
Nangipeksa iti panagatendar ni Zelensky ngem agdudua pay laeng ti Russia.
Mangipatulod ti pannakabagi ti Ukraine iti panagsinnarita a mabalin a maiyuswat iti Miami wenno idiay Abu Dhabi, United Arab Emirates.
Maipalagip a namin-adu a daras a nangisayangkat ti panagtataripnong ti Amerika tapno malippasen ti agarup uppat a tawen a panangraut ti Russia iti Ukraine.
