LAOAG CITY – Adda ti katulagan a pinirmaan ti Russia ken North Korea tapno matulungan iti tunggal maysa no adda ti rumaot kadakuada.
Daytoy ti inpakaammo ni Russian President Vladimir Putin kalpasan ti panagtaripnong da ken ni North Korean Leader Kim Jong Un.
Iti ibibisita ni Putin iti North Korea kalpasan ti 24 a tawen, inkari ni Kim Jong Un ti sibubukel a suporta na iti Russia iti panangraot na iti Ukraine.
Immuna iti daytoy, sinarabo ti North Korea ni Putin babaen ti red carpet bayat a dagiti naruay a tattao ket nakaiggem iti sabsabong ken inwagayway da idi mapasungadan da ti Russian President, kalpasan na ket naiyuswat ti ceremonial gunfire.
Nagyaman ti Russian president ken ni Kim iti panangimbitar na kenkuana iti Pyongyang, ken mangnamnama nga iti sumaruno a taripnong da ket maiyuswat to metten iti Moscow.
Maipalagip nga ak-akusaran ti Estados Unidos ken South Korea ti North Korea a mangsupsuplay ti artillery ammunition ti Russia kasukat ti food ken military aid, banag a naglikudan nga agpada ti dua a pagilyan.
Naamoan a kalpasan iti North Korea ket ti sumaruno a mapan bisitaen ni Putin ket ti Vietnam a nabayagen a kaalyado na.
