LAOAG CITY – Nagbalin a naisangsangayan ti panagkita da United States President Donald Trump ken Russian President Vladimir Putin iti maysa nga high-stakes summit idiay Alaska a gagem a mapagsaritaan ti kumarkaro a situasion idiay Ukraine.
Iti baet nga awan ti pormal a katulagan iti ceasefire ket agpada dagiti dua a lider ti nangipeksa ti namnama dagitoy iti posibilidad ti kinakappia.
Inbatad ni Trump a nagbalin a naiget a produktibo ti taripnong no sadinno nga adu a banag ti napagsasaritaan nga immannugotda.
Nupay kasta, nagtalinaed a nakalukat dagiti sensitibo a topiko pakairamanan ti seguridad ti Ukraine ken dagiti kondision ti Russia iti panaglippas ti gubat.
Iti biang met ni Putin, inladawanna ti gubat kas maysa a trahedia para iti agsinnungbangir a partido.
Inpetteng ni Putin ti kinapateg ti personal a panagsarita iti nagbaetan ti dua a lider.
Inpakaammo ni Trump a maaddaan ti maikadua a summit a manamnama ti naun-uneg a pannakatalantan iti peace deal.
Naammoan a posible a maimbitaran ni Ukrainian President Volodymyr Zelenskyy tapno agbalin a paset ti negosasion.
