LAOAG CITY – Inbatad ni Burundi President Évariste Ndayishimiye nga adda ti “credible intelligence” mainaig iti plano ti Rwanda a rumaot iti pagilian da.
Inbutaktak pay ti Presidente a ginandat pay ti Rwanda ti mangipatungpal ti kudeta iti Burundi, addan maysa a dekada ti napalabas no sadinno a kastoy ti ar-aramiden da iti agdama iti Democratic Republic of Congo.
Nupay kasta, kuna ti presidente nga awan ti plano da a rumaot iti Rwanda gapu ta kayat da a masolbar ti problema iti nagbaetan da babaen iti panangiyuswat da ti dayalogo.
Kabayatanna, sinungbatan ti Rwanda ti alegasyon ti Burundi Presidente no sadinno nga inawagan na ti alegasyon na a “surprising” ken inpetteng na a ti dua nga agkarruba a pagilian ket agtintinnulong laeng iti security plans para iti border da a nakaserra, addan agarop maysa a tawen ti napalabas.
