LAOAG CITY – Inlawlawag ni Doctor Norman Rabago, ti Covid-19 consultant ditoy probinsya no apay a nagdudupudop dagiti tattao kangrunaan na dagiti senior citizens a napan nagpabakuna iti Northern Christian College (NCC) ditoy ciudad ti Laoag.
Inbatad na a saan a nasurot ti schedule no sadinno a dagiti mabakunaan koma iti oras ti alas-otso ti bigat ket alas-nuebe da a nakapan isut gapuna nga atiddog ti pila.
Kuna na pay a maikadwan a dose ti pinagbakuna dagiti maseknan.
Inbaga ni Doctor Rabago nga idi naiyuswat ti umuna a panagbakuna dagiti maseknan iti Divine Word College of Laoag (DWCL) ditoy ciudad ket ado dagiti timmulong iti Provincial Health Office (PHO) ken Department of Health (DOH) idinto nga iti maikadwa a dose a panagbakuna da ket nagkurkurang ti tao da.
Gapu iti daytoy, kuna ni Rabago a saan da a nagabenan ti nagbakuna kadagiti ado a tattao.
Nagpadespensar ni Rabago iti nagkurangan da ngem kuna na nga inkarigatan da a binakunaan amin dagiti napan nagpabakuna.
