LAOAG CITY – Inbatad ni Mrs. Cherry Joy Garma, ti Information Officer ti DepEd-Ilocos Norte a ti saan a required a panagisuot ti uniporme ket datin a polisiya ti ahensya.
Segun kenni Garma, dagiti pagadalan ket mabalin nga agimplementar ti prescribed uniform ngem saan a mandatory kadagiti estudyante nangruna no awan ti paggatang wenno pagpadait dagiti nagannak.
Inlawlawag na a mabalin met nga agusar dagiti regular a bado da basta disente gapo ta ammo met ti DepEd a saan nga agpapada ti estado ti panagbiag dagiti estudyante.
Kunana a daytoy ket basar pay laeng iti DepEd Order No. 65 series of 2010.
Inpetteng na nga iti pampubliko a pagadalan, saan a mabalin a maipatungpal ti “No Uniform, No Entry” Policy malaksid iti pribado a pagadalan.
Mainaig iti daytoy, kunana nga agtultuloy met ti monitoring ti Division office iti panangimplementar iti guidelines.
