Inbatad ni Brgy. Kagawad Manny Morales iti Brgy. 1 ditoy siudad ti Laoag a ti 16,000 a food packs manipod iti lokal a gobierno iti siudad ti Laoag ket nabingay kadagiti amin a barangay.
Kuna na a manipod iti nasao a bilang ket nagasat a naipaayan ti 759 a food packs iti barangayda.
Inlawlawag na a daytoy ket naibunong met kadagiti walo a sitio ken saan nga amin a pamilya ket nabungungan agsipod ta saan a makaumanay daytoy.
Inbatad na a nasurok a tallo a ribo ti populasyon iti barangay da ken nasurok 1,000 ti household isut gapu na a napili laeng dagiti naikkan ti food packs.
Inpakaamo ni Morales a kangrunaan a naipaayan ket dagiti low income a pamilya wenno dagiti naminpinsan a napukawan ti trabaho gapu iti pandemiya.
Mainaig iti daytoy, inbaga na dagiti naibilang iti listaan ti SAP iti kallabes ngem nakasubli metten iti trabaho ket saanen a naikkan ti ayuda.
Nu pay kasta, kuna na nga innala da ti listaan ti nagan dagiti saan a nakaawat tapno dagitoy ti dumalan iti assessment nu bilang addan to manen ti maipaay a food packs.
Immuna iti daytoy, adda ti nangipadanon ti reklamo iti Bombo Radyo seknan iti maipagarup a saan a pannakaipaay ti food packs kadagiti amin a residente iti Brgy. 1 ditoy siudad.
