LAOAG CITY – Aminado ni Mr. Harvey Calamayan, ti meat inspector iti ili ti San Nicolas a problema da ti agdama a presyo iti kada kilo ti live weight iti baboy nangruna ket ado dagiti hog raisers nga aglaklako.
Inbatad na a karaman kadagiti reklamo ket ti maipagarop a baraten dagiti partidor ti panaggatang da.
Segun kenni Calamayan, 180 a pisos iti kada kilo ti live weight ti baboy ti suruten dagiti aggatang.
Gapo iti daytoy, immapela ni Calamayan kadaiti partidor a suruten da ti ummunan a panagtutulagan tapno awan ti tumaod a problema iti panagtaraken ken panaglako iti baboy.
Inadmitir met ni Calamayan nga adda ti dakkel a piggery iti ili ti San Nicolas nga arig na isu ti mangkontrol iti presyo ti live weight gapo ta no daytoy ti paggatangan dagiti partidor ket nalaklaka isut gapo na a mapilitan dagiti hog raisers nga ibaba ti presyo.
Mainaig iti daytoy, inbatad na a plano da manen ti mangiyuswat ti taripnong tapno malawlawagan ti isyu ti presyo ti live weight ti baboy.
Kabayatanna, innayon na a saan laeng met nga iti ili ti San Nicolas ti makapaspasar iti daytoy a nalaka a paggatang ti kada kilo ti live weight ti baboy.
