LAOAG CITY – Saan unay a makatulong iti Pilipinas ti death penalty kontra kadagiti personalidad nga adda ti pannakainaig na iti iligal a druga.
Daytoy ti reaksiyon ni Atty. Domingo Cayosa, IBP national president, seknan iti inrakurak ni Presidente Rodrigo Duterte a maisubli ti death penalty babaen iti lethal injection kabayatan ti SONA na idi kalman.
Kuna na a no maidasig kadagiti dadduma a pagilian nga addaan ti death penalty ket saan nga ayado iti Pilipinas.
Segun kenni Cayosa, uray adda ti naipatungpal a death penalty kabayatan dagiti immuna nga administrasyon iti napalpalabas a tawen ket adu pay laeng dagiti naimaldit a krimen.
Inbatad na a saan a mabuteng dagiti kriminal uray ti death penalty gapu ta kabaelan da a pasuksukan dagiti otoridad kasta pay iti panangbutbuteng ken panangimpluwensya da dagiti maseknan nga otoridad.
Kuna na a saan a maikkat daytoy nga aramiden dagiti kriminal ken dagitoy ket naibasar iti panagadal da gapu iti kinabayag ti hustisya ditoy pagilian.
Innayon ni Cayosa a 80 a porsiento ti dagiti drug cases ditoy pagilian rason a saan a malmalpas ti panaggaraw ti iligal a druga gapu ta nalukay iti pannakaipila ti kaso kontra kadagiti adda ti pannakainaig na iti iligal a druga ken dagiti maseknan nga otoridad.
Nasken a naiget ti justice system ti pagilian tapno adda ti kabuteng dagiti maibilang a kriminal.
