LAOAG CITY – Inbatad ni Doctor Renato Mateo, ti City Health Officer ditoy ciudad ti Laoag a ti pay laeng kaepektiboan a panglaban ti coronavirus ket ti personal hygiene ken kanayun a panagugas ti ima babaen ti sabon a paglaba.
Inbalakad na a no sumangpet iti pagtaengan ket masapol nga agdigus a dagus ken agusar ti sabon a paglaba.
Inlawlawag ni Mateo a ti coronavirus ket proteins ken ti mangdepdepensa kenkuana ket thin layer ti fats.
Innayon na a ti sabon a paglaba ket isu ti pangdadael ti thin layering ti protein ti virus ken no mapasamak daytoy ket isu metten ti pakatayan ti nasao a virus.
Kabayatanna, kuna ni Mateo a saanna a masigurado no epektibo met ti maus-usar a pag-disinfect kadagiti lugan ken nagduduma a ramit iti maysa a tao.
Reaksyon na daytoy mainaig iti pannaka-spray ti taga Barangay Ricarte iti ciudad nga OFW a naggapo idiay Hongkong usar ti pagis-spray kadagiti lugan ken nagduduma a ramit gapu iti covid-19.
