LAOAG CITY – Nagsaritan ti negosyante a ni Sam Verzosa maipanggep iti panagsina da iti aktres a ni Rhian Ramos.
Iti programa a Fast Talk with Boy Abunda, inbatad ti negosyante nga adda ti panagdudua na no umannugot nga agpainterview, ngem inkari na a daytoyen ti maudi a panagsarita na maipanggep iti isyu.
Inpasingked na a nalabes ti panangipateg na ken ni Rhian ken ibilang na a maysa kadagiti karagsakan nga aldaw iti biagna ti panawen ti relasyon da.
Kuna na pay a dakkel a pakaidayawan na ti panagbalin na a paset ti biag ti aktres.
Nupay kasta, iti baet nga agpinpinnateg ti dua nga indibidual, saan a maliklikan nga adda dagiti pasamak a saan a kontrolado a mangitunda iti panagsina dagitoy.
Inlawlawag ni Sam nga awan ti gura na iti napasamak iti relasyon da ken ni Rhian, ken ti laeng gagem na ket ti naan-anay a kinaragsak ken panagballigi ti aktres.
Innayon na nga awan ti pakainaigan ti eleksyon idi 2025 no sadinno a nagpaidasig a para mayor iti Maynila ti panagsina da ken ni Rhian.
Kabayatanna, kuna ni Sam a saandan nga agsarsarita pay ken ni Rhian.
