LAOAG CITY – Napalaos ti ragsak ni Mr. Sherween Cabrales, ti conductor ti Samiweng Singers manipud iti Ilocos Norte National High School (INNHS) ditoy ciudad ti Laoag City iti panangabak da iti dua a kategorya iti World Choir Games 2023.
Ti nasao a kompetisyon ket naiyuswat iti Gangneung, Republic of Korea idi kalman, Hulyo 12 ita a tawen.
Segun kenni Cabrales, dagiti dua a kategorya a naksalipan ti Samiweng Singers ket ti Musica Contemporenea Mixed Voices ken Mixed Youth Choirs ken addaan da ti total score a 25.08 ken 23.90.
Inbatad na a nakilaban da manen idi 2012 ken isu ti naudi a pannakaisalip da iti international competition agingga ita a tawen nga isu ti nangabakan da.
Inpakammo na a ti laeng Samiweng Singers ti nakaala ti gold iti agpada a kategorya ken isu pay ti kangatoan iti Musica Contemporenea Mixed Voices.
Inlawlawag na a ti Samiweng Singers ket nakisalip iti part 2 ti World Choir Games 2023 ken nagturong da idiay Korea idi Hulyo 9 ken ita nga aldaw ti maudi nga aldaw da iti nasao a lugar, ken mapan da idiay Seoul sakbay ti panagsubli da ditoy Pilipinas.
Mainaig iti daytoy, nagyaman met ni Cabrales kadagiti amin a timmulong agingga a nagun-od da ti dakkel a pammadayaw para iti probinsya ken iti pagilyan a Pilipinas.
Kabayatanna, kunana nga idi kuman pay tawen 2022 ti pannakaiyuswat daytoy ngem naitantan ita a bulan gapo iti pandemya ken maangay to manen daytoy intono 2024 idiay New Zealand ken 2026.
