LAOAG CITY – Arigna nakigtot ti maysa a mahistrado ti Sandiganbayan iti kaado ti naireport a sakit ni dati a Department of Public Works and Highways (DPWH) Secretary Manuel Bonoan, a karaman kadagiti akusado iti kaso a plunder ken graft mainaig iti maipagarop a maanomalya a flood control projects.
Iti inbasa a dokumento ni Sandiganbayan Presiding Justice Geraldine Econg ti Second Division, karaman kadagiti sakit ni Bonoan ket ti chronic kidney disease (CKD), prostate cancer, diabetes, hypertension, acute coronary syndrome, ken spine condition.
Ti dati a sekretaryo ti Department of Public Works and Highways ket agdama a naka-confine iti The Medical City ken kinumpirmaran daytoy ti nailian a pulisya.
Gapu iti daytoy, inbatad ti korte nga agkiddaw daytoy ti updated medical report manipod iti Philippine National Police (PNP) tapno maamoan ti pudno a kondisyon ti dati nga opisyal.
Maipalagip a sumangsango ni Bonoan iti P573-million plunder and graft cases mainaig iti maanomalya a flood control projects, no sadinno a karaman met kadagiti akusado ni Senador Jinggoy Estrada ken dadduma pay a dati nga opisyal ti Department of Public Works and Highways.
Basar iti Office of the Ombudsman, adda ti pakainaigan ti kaso iti maipagarop a kickback scheme kadagiti flood control projects iti Bulacan.
Naipalaon iti reklamo a maipagarop a timmulong ni Bonoan iti panagiproseso kadagiti “commitment fee” para ken ni Estrada, a maibagbaga a nagkiddaw ti P855 million a pondo para kadagiti proyekto.
Kinumpirmaran pay dagiti piskal ti Ombudsman, a ni Bonoan ket maipagarop nga addaan ti papel iti panagpili kadagiti kontratista a nakaala kadagiti nasao a proyekto.
Naiget met a naglikudan nga agpda da Bonoan ken Estrada ti amin nga akusasyon kontra kadakuada.
