Sang Panlungsod, binigbig na ti dua nga estudyante manipod iti Rodolfo CG Fariñas Jr. National Science High School ditoy ciudad ti Laoag

LAOAG CITY – Binigbig ti Sang Panlungsod ditoy ciudad ti Laoag ti dua nga estudyante manipod iti Rodolfo CG Fariñas Jr. National Science High School.

Daytoy ket kalpasan a napagasatan da iti pannakisalip iti HongKong International Science Olympiad (HKISO) – Final Round.

Nabigbig dagitoy a da 𝑴𝒊𝒈𝒖𝒆𝒍 𝑪𝒂𝒓𝒍𝒐𝒔 𝑮. 𝑺𝒆𝒃𝒂𝒔𝒕𝒊𝒂𝒏 a nakagun-od ti 𝑺𝒊𝒍𝒗𝒆𝒓 𝑨𝒘𝒂𝒓𝒅, ken ni 𝑪𝒉𝒍𝒐𝒆 𝑨𝒏𝒏𝒆 𝑭. 𝑩𝒖𝒍𝒐𝒏𝒈 a nakagun-od ti merit award.

Ti HongKong International Science Olympiad ket maysa a naoget a competitive international competition a mangsubok iti scientific knowledge ken problem-solving abilities dagiti agad-adal.

Binayabayan ti Officer-in-Charge iti nasao a pagadalan a ni Mrs. Flenie A. Galicinao ken ti coach a ni Ms. Shaira Marie S. Valdez dagiti nasao nga estudyante iti papanda pannakilaban iti ballasiw taaw.

Mainaig iti daytoy, nagyaman ni Vice Mayor Rey Carlos Fariñas kadagiti nasao nga estudyante gapu ta ti balligi da ket para iti intero a ciudad ti Laoag.