LAOAG CITY – Nagsurat ti Sangguniang Panlungsod ditoy ciudad ti Laoag iti Central Office ti Department of Education para iti panagoperar ti Rodolfo CG Farinas Junior National Science High School iti Brgy. 55-C Vira ditoy ciudad.
Iti regular a sesyon, imbatad ni Sang. Panglungsod Member Jaime Farinas nga idi pay laeng Agosto 2022 ken Hulyo 2023 a nangipatulod ti Sangguniang Panglungsod ti surat iti Central Office ti Department of Education ken dua nga endorsement letter nga inpatulod ni Regional Director Joann Corpuz ken ti legal officer.
Malagip a ti ummuna nga adbokasya iti pannakaipatakder ti pagadalan ket tapno makissayan ti bilang dagiti out-of-school-youth ditoy ciudad.
Dinakamat na pay ti Section 1 ti Article 14 ti 1987 Constitution no sadinno a masapol a salakniban ken itandudo ti Estado ti karbengan ti amin nga umili iti de kalidad nga edukasion iti amin a lebel, ken mangaramid kadagiti maiyannatop nga addang tapno magun-od ti edukasion iti amin.
Kabayatanna, inbatad ni Fariñas a dagiti tugaw ti Rodolfo CG Farinas Junior National Science High School ket innala ken naggudwaan ti Ilocos Norte National High School (INNHS) ken Ilocos Norte College of Arts and Trades (INCAT), kasta pay nga awan pay ti nai-isyu nga implementing rules and regulations ti RA 10965 ti Central Office ti Deparment of Education. Malagip a ti National Science High School ket proyekto idi ti dati a Congressman Rudy Farinas ken ti dati a Bokal Ria Farinas ken pinirmaan ni dati a Presidente Rodrigo Roa Duterte idi Disyembre 28, 2017.
