LAOAG CITY – Inaprobaran ti Sang. Panlungsod ditoy ciudad ti Laoag ti resolusyon a maiyalud-od ti panag-renew ti business permit agingga iti bulan ti Pebrero.
Segun ken ni Diomedes Gayban City Treasurer ditoy ciudad ti Laoag, idi kalman Enero 16 ket nakairekord ti opisinada ti 18.6 a porsiento manipod iti 6,000 a pasdek negosyo ditoy ciudad.
Kunana a narigatda nga ikamakam no masurot ti immuna a naituding ti panagngudo ti panagrenew nga inton Enero 20, 2024.
Namnamaen pay ni Gayban ti 10 a porsiento ti a mainayon iti koleksyon da a tax ita a tawen 2024.
Naamuan nga umabot iti 105 a milyon a pisos ti business tax idi 2023.
Maipalagip a nangrugi ti panag-renew iti umuna a lawas daytoy a bulan ti Enero.
