LAOAG CITY – Nangipasa ti Sang Panlungsod iti maysa a resolusyon a mangsuporta ti pannakaimplementar ti Republic Act 11321 wenno ti Sagip Saka Act.
Ti nasao a resolusyon ket indasar ni Liga ng mga Brgy. President Rbee Ablan a mailinya ti executive order Number 101 nga inparuk-at ni Presidente Ferdinand Marcos Jr. para iti naan-anay a pannakaiyimplementar daytoy.
Segun kenni Ablan, ti nasao a linteg ket mangpapigsa kadagiti Local Government Units tapno gumatang a direkta kadagiti agricultural ken fishery products manipod kadagiti accredited a kooperatiba dagiti mannalon ken mangngalap.
Kunana a babaen iti daytoy nga inisyatibo ket mapapintas ti lokal nga industriya, ad-adda pay a maitandudo ti food security, ken mapapintas ti pammastrekan dagiti mannalon ken mangngalap.
Mamati a babaen iti nasao nga addang ket ado dagiti mannalon ken mangngalap a matulongan ditoy ciudad ti Laoag aglalo ket kanayon da a problema ti saan a pannakailako nga insigida dagiti maapit da iti kataltalonan ken kabaybayan.
Maipalagip nga iti laeng kallabes ket inpasa ti senado babaen ti panangidasar ni Sen Kiko Pangilinan, ti chairman ti Committee on Agriculture daytoy a banag a mangmandar iti amin nga ahensiya ti gobierno nga ipangruna ti panaggatang kadagiti agricultural and fishery products kadagiti mamanalon ken mangngalap ditoy pagilian.
