LAOAG CITY – Inpakaammo ni Sangguniang Panlungsod Member Derick Lao ditoy siudad ti Laoag a masapol a maamendaran dagiti ordinansa maipanggep iti pannakaipataw ti pannusa kadagiti walang nga aso.
Segun kenkuana, babaen iti daytoy ket maipangato ti multa a bayadan dagiti maseknan nga akin-taraken ti aso a nakakagat ti maysa nga indibidual tapno ad-adda a mapaigetan ti pannakaipatungpal ti nasao nga ordinansa.
Inbatadna a naidasarna daytoy a banag kalpasan a kiniddaw ni Barangay Captain Elmer Siazon iti Barangay 28 ditoy siudad ti Laoag kenkuana a masapol a ma-picture wenno maalaan ti ladawan dagiti amin a taraken nga aso tapno madeterminar no asino ti akinkukua ti aso no ingkaso nga adda ti aso a kimmagat kadagiti residente.
Maipalagip nga adda ti tallo nga ubbing ti nakagat ti walang nga aso a nagpositibo iti rabies iti nasao a barangay.
