LAOAG CITY – Nabubuong ti sarming ti maysa a van a kukua dagiti saanen a nagpabigbig nga agasawa gapo iti impact ti jet blast ti eroplano bayat ti panagtake-off daytoy.
Segun kadagiti agasawa, agpadaya da iti ruwar ti runway ti Laoag International Airport ngem eksakto met nga agtake off ti eroplano a nangitunda ti pannakabuong ti sarming ti lugan da.
Inbatad dagitoy nga adda ti sarsarunwen da a tricycle iti dayta a gundaway ken no patarayen ti driver ti van ket madungpar na met ti adda iti sangwanan na agingga a nakigtot da laengen idi nabubuong ti sarming ti behikulo da.
Kalikagom ita dagiti agasawa a maamoan no adda ti sungsungbatan ti Laoag International Airport ken ti pannakaipan ti ad-ado pay a pakdaaar wenno signages iti mismo a lugar tapno saanen a maulit daytoy nangruna ket ado dagiti aglabas met laeng iti daytoy.
Inlawlawag na pay a no adda ti pakdaar nga adda ti agtake off nga eroplano ket saan met a lumabas dagiti motorista.
Mainaig iti daytoy, inbatad ni Mr. Ronald Estabillo, ti CAAP Manager a daytoy ti ummuna a gundaway nga adda ti kastoy a napasamak.
Gapo iti daytoy, inpasigurado na nga imbestigaren da a naimbag daytoy tapno saanen a maulit pay.
