LAOAG CITY – Agkakadakkel ti loan nga inaprobaran ti SB Corporation iti iyuumayda panangidiaya ti pautang kadagiti umili ditoy probinsia ti Ilocos Norte.
Inpakaammo ni Mrs. Elma Gabriel, mangidadaulo ti Micro Small and Medium Enterprise Office wenno MSMEO ti Provincial Government of Ilocos Norte wenno PGIN a tallo gasut a ribu a pisos ti kadakkelan a loan nga inaprobaran ti nadakamat a korporasyon.
Segun kenkuana, kaaddoan kadagitoy ti addaan ti negosyo a mainaig iti “trading” ken sumagmamano ti ket iti “manufacturing, services, dining” ken adda pay ti “Agri-base”.
Inpalgakna nga umabot iti nakurkurang ngem sangapulo ket lima a milyon a pisos ti inaprobaran ti SB Corporation a loan dagiti umili ditoy probinsia.
Inlawlawagna a kadagupan dagiti sanga gasut tallopulo ket siyam a nagaplikar ket siyam a pulo ket tallo dagiti naaprobaran ti loanda.
Mamati daytoy nga ad-adu kadagiti umili ti nagaplikar iti iyuumay panangidiaya ti nasao a korporasyon iti panangipaayda ti loan no saan a nairana iti bagyo Kristine.
Inbatadna a sakbay nga insayangkat ti SB Corporation ti “roadshow” dagitoy ditoy probinsia idi Oktubre 30 ket nagawaten dagitoy ti aplikasyon iti loan dagiti interesado nga umutang kadakuada iti tulong ti Micro Small and Medium Enterprise Office.
Kunana a nagtultuloy ti panagawatda ti aplikasyon agingga idi Oktubre 31 gapu iti pannakakanselar dagiti flights iti Laoag International Airport wenno LIA iti nadakamat nga aldaw.
Kabayatanna, inbunannag ni Gabriel nga iti agdama ket addan ti naparuk-atan a nasursuruk ngem dua a milyon a pisos kadagiti naaprobaran ti loanda a kakailian iti nadakamat a korporasyon.
